x
logo

पालकमंत्री व केडीसीसी बँकेचे अध्यक्ष हसन मुश्रीफ यांनी छोटे-मोठे दुकानदार, व्यापारी, उद्योजक व व्यावसायिकांना बँकेच्या क्यू आर कोडचे वाटप केले.


छोट्या- मोठ्या दुकानदारांसह व्यापारी, उद्योजक, व्यावसायिकांना सुविधा.

कोल्हापूर जिल्हा मध्यवर्ती सहकारी बँकेच्यावतीने छोटे-मोठे दुकानदार, व्यापारी, उद्योग व व्यावसायिकांना क्यूआर कोड देण्याची मोहीम हाती घेतली आहे. त्या अंतर्गत पालकमंत्री व बँकेचे अध्यक्ष हसन मुश्रीफ यांच्या हस्ते गडहिंग्लज शहरातील छोटे -मोठे दुकानदार, व्यापारी, उद्योजक व व्यावसायिकांना क्यू आर कोड चे वाटप झाले. त्यानंतर दिवसभर बँकेचे मुख्य कार्यकारी अधिकारी व अधिकाऱ्यांनी फिरून मुख्य बाजारपेठेतील भाजीपाला विक्रेते, किराणा दुकानदार, लॉन्ड्री, सलून, औषध विक्रेते व इतर व्यावसायिकांना क्यूआर कोडचे वाटप केले. यावेळी बोलताना मंत्री श्री. मुश्रीफ म्हणाले, केडीसीसी ही शेतकऱ्यांची बँक आहे. तसेच; क्यू आर कोड च्या दैनंदिन पिग्मी भिशीच्या माध्यमातून छोटे-मोठे व्यापारी, दुकानदार, उद्योग, व्यवसायिक, उद्योजक, विक्रेते यांची नाळ बँकेशी घट्ट जोडली जाईल. बँकेच्या अधिकाऱ्यांनी आणि कर्मचाऱ्यांनी या क्यूआर कोड मोहिमेत स्वतःला झोकून देऊन काम करावे. सुरुवातीला गडहिंग्लज शहर, त्या पाठोपाठ तालुक्यातील मोठी गावे आणि मग ग्रामीण भागात या पद्धतीने ही मोहीम यशस्वी केली जाईल. केंद्र कार्यालयात माहिती व तक्रार निवारण कक्ष……!

पालकमंत्री हसन मुश्रीफ म्हणाले, बँकेने मोहीम हाती घेतलेल्या क्यूआर कोडचे ॲक्टिवेशन अवघ्या एक दिवसातच होणार आहे. त्याच्या चौकशी, माहिती देण्यासाठी आणि तक्रार निवारणासाठी केंद्र कार्यालयात एक स्वतंत्र तक्रार निवारण कक्ष स्थापन केला आहे.

यावेळी केडीसीसी बँकेचे संचालक संतोष पाटील, बँकेचे मुख्य कार्यकारी अधिकारी श्री. जी. एम. शिंदे, माजी उपनगराध्यक्ष किराणअण्णा कदम, जिल्हा परिषदेचे माजी उपाध्यक्ष सतीश पाटील-गिजवणेकर, हरून सय्यद, सिद्धार्थ बन्ने, बाळासाहेब देसाई- मंचेकर, सदानंद पाटील, गुंडेराव पाटील, रश्मीराज देसाई आदी प्रमुख उपस्थित होते.

कागल : पालकमंत्री व केडीसीसी बँकेचे अध्यक्ष हसन मुश्रीफ यांनी स्वतः रस्त्यावर उतरत छोटे-मोठे दुकानदार, व्यापारी, उद्योजक व व्यावसायिकांना बँकेच्या क्यू आर कोडचे वाटप केले.


कागलमध्ये मंत्री हसन मुश्रीफ यांनी स्वतः रस्त्यावर उतरत केले क्यू आर कोड चे वाटप.
केडीसीसीचा क्यू आर कोड होणार एक दिवसात ॲक्टिव्ह.

कोल्हापूर जिल्हा मध्यवर्ती सहकारी बँकेच्यावतीने छोटे-मोठे दुकानदार, व्यापारी, उद्योग व व्यावसायिकांना क्यूआर कोड देण्याची मोहीम हाती घेतली आहे. या मोहिमेची सुरुवात पालकमंत्री व बँकेचे अध्यक्ष हसन मुश्रीफ यांनी कागलमध्ये रस्त्यावर उतरून स्वतः उद्योजक व व्यावसायिकांना क्यूआर कोड वाटप केले. सकाळी साडेआठ वाजल्यापासून अकरा वाजेपर्यंत मंत्री श्री. मुश्रीफ यांनी भाजीपाला विक्रेते, किराणा दुकानदार, लॉन्ड्री, सलून, औषध विक्रेते व इतर व्यावसायिकांना क्यूआर कोडची वाटप केले. शहरातील मुख्य बाजारपेठेत गैबी चौकापासून बस स्थानकापर्यंतच्या विविध विक्रेत्यांना या क्यूआर कोडचे वाटप झाले. यावेळी बोलताना मंत्री श्री. मुश्रीफ म्हणाले, केडीसीसी ही शेतकऱ्यांची बँक आहे शेतकऱ्यांची बँकेची घटना आहेच. तसेच; क्यू आर कोड च्या दैनंदिन पिग्मी भिशीच्या माध्यमातून छोटे-मोठे व्यापारी, दुकानदार, उद्योग, व्यवसायिक, उद्योजक, विक्रेते यांची नाळ बँकेशी घट्ट जोडली जाईल. बँकेच्या अधिकाऱ्यांनी आणि कर्मचाऱ्यांनी या क्यूआर कोड मोहिमेत स्वतःला झोकून देऊन काम करावे. कागल शहरासह तालुक्यातील मुरगुड, कसबा सांगाव, सेनापती कापशी, नानीबाई चिखली, बिद्री- बोरवडे, सिद्धनेर्ली, म्हाकवे, सावर्डे बुद्रुक आदी मोठ्या गावांमध्ये जाऊन येत्या दोन आठवड्यात क्यूआर कोड वाटपाचे उद्दिष्टे पूर्ण करावे. त्यानंतर उर्वरित ग्रामीण भागात जावे. माहिती व तक्रार निवारण कक्ष स्थापणार……..!

पालकमंत्री हसन मुश्रीफ म्हणाले, बँकेने मोहीम हाती घेतलेल्या क्यूआर कोड च्या चौकशी, माहिती देण्यासाठी आणि तक्रार निवारणासाठी केंद्र कार्यालयात एक स्वतंत्र तक्रार निवारण कक्ष स्थापन करणार आहोत. यावेळी केडीसीसी बँकेचे संचालक प्रताप उर्फ भैया माने, बँकेचे मुख्य कार्यकारी अधिकारी श्री. जी. एम. शिंदे तसेच अधिकारी व कर्मचारी उपस्थित होते.

केडीसीसी बँकेला वैकुंठभाई मेहता उत्कृष्ट जिल्हा बँक पुरस्कार नाशिकमध्ये समारंभात पुरस्काराचे वितरण

कोल्हापूर, दि. ११: कोल्हापूर जिल्हा मध्यवर्ती सहकारी बँकेला यावर्षीचा वैकुंठभाई मेहता उत्कृष्ट जिल्हा बँक पुरस्कार मिळाला. नाशिकमध्ये झालेल्या एका खास कार्यक्रमात बँकेच्या संचालिका सौ. श्रुतिका काटकर आणि प्रभारी मुख्य कार्यकारी अधिकारी श्री. जी. एम. शिंदे यांनी हा पुरस्कार स्वीकारला. माजी रेल्वेमंत्री व भारत सरकारच्या सहकार मंत्रालयाच्या नव्या सहकार कायदा मसुदा समितीचे अध्यक्ष खासदार सुरेश प्रभू, एमएससी बँक असोसिएशनचे अध्यक्ष विश्वास ठाकूर, सहकार आयुक्त अनिल कवडे, महाराष्ट्र अर्बन को-ऑपरेटिव बँक फेडरेशनचे अध्यक्ष अजय ब्रम्हेचा, श्रीमती शोभाताई अहिरे, असोसिएशनचे उपाध्यक्ष वसंत भुईखेडकर या मान्यवरांच्या हस्ते पुरस्कार वितरण झाले. महाराष्ट्र राज्य सहकारी बँक्स असोसिएशन लिमिटेड -मुंबई यांच्यावतीने दरवर्षी सहकारात उत्कृष्ट काम करणाऱ्या सहकारी बँकांना या पद्धतीने पुरस्कार वितरण केले जाते. हे वर्ष पुरस्कार वितरणाचे २५ वे म्हणजेच रौप्यमहोत्सवी वार्षिक पारितोषिक वितरण समारंभ होता. सन २०२२-२३ या आर्थिक वर्षाकरिता पुणे विभागातील विशेष पुरस्काराने केडीसीसी बँकेला गौरविण्यात आले. “मूल्यमापन आर्थिक मापदंडांचे……” या पुरस्कारासाठी केडीसीसी बँकेच्या दि. ३१ मार्च २०२३ या आर्थिक वर्षातील मूल्यमापन झाले. दृष्टीक्षेपात बँकेचे आर्थिक मापदंड असे………!
ढोबळ नफा: रू. २०४ कोटी
सी. डी. रेशो: ८६ %
सी.आर.ए.आर.: १४ टक्के
नेट एनपीए: शून्य टक्के
सर्वच म्हणजे १९१ शाखा नफ्यात नाशिक: कोल्हापूर जिल्हा मध्यवर्ती सहकारी बँकेला पुणे विभागातील वैकुंठभाई मेहता उत्कृष्ट सहकारी बँक या विशेष पुरस्काराने गौरविण्यात आले. माजी केंद्रीय मंत्री खासदार सुरेश प्रभू व एमएससी बँक्स असोसिएशनचे अध्यक्ष विश्वास ठाकूर यांच्या हस्ते संचालिका सौ. श्रुतिका काटकर व प्रभारी मुख्य कार्यकारी अधिकारी जी. एम. शिंदे यांनी हा पुरस्कार स्वीकारला.

सहकारामुळे गोरगरिबांचे जीवनमान उंचावले पालकमंत्री नामदार हसनसाहेब मुश्रीफ

७० व्या अखिल भारतीय सहकार सप्ताहानिमित्त केडीसीसीत ध्वजारोहण कोल्हापूर, दि.१४: सहकारामुळे सर्वसामान्य गोरगरीब माणसाचीही समाजात पत निर्माण झाली असून सहकारामुळेच गोरगरिबांची उन्नती झाली आहे, असे प्रतिपादन बँकेचे अध्यक्ष, राज्याचे वैद्यकीय शिक्षण व विशेष सहाय्य मंत्री तथा; कोल्हापूर जिल्ह्याचे पालकमंत्री नामदार हसनसाहेब मुश्रीफ यांनी केले. ७० व्या अखिल भारतीय सहकार सप्ताहानिमित्त कोल्हापूर जिल्हा मध्यवर्ती सहकारी बँकेच्या केंद्र कार्यालयात ध्वजारोहण पालकमंत्री श्री. मुश्रीफ यांच्या हस्ते झाले. यावेळी बोलताना मंत्री श्री. मुश्रीफ म्हणाले, सहकारामधूनच तयार झालेली साखर कारखानदारी, बँकिंग, सूतगिरण्या, दूध संघ व इतर अनेक संस्था यामुळेच राज्यासह देशाची आर्थिक घडी मजबूत आहे. त्यामुळे सामान्यातील सामान्य माणसाचे जीवनमानही उंचावले आहे. विशेषता: पश्चिम महाराष्ट्राच्या जडणघडणीमध्ये सहकाराचे योगदान मोठे आहे. सहकार चळवळ निकोप, पारदर्शक हवी. सहकाराचा स्वाहाकार होता कामा नये. यासाठी पदाधिकाऱ्यांबरोबरच अधिकारी व कर्मचाऱ्यांनीही जबाबदारी, प्रामाणिकपणा आणि नैतिकतेने काम केले पाहिजे, असेही ते म्हणाले. यावेळी संचालक मंडळातील प्रताप उर्फ भैया माने, विजयसिंह माने, सौ. स्मिता गवळी, कामगार प्रतिनिधी दिलीप लोखंडे व आय. बी. मुन्शी आदी संचालकांसह माजी संचालक असिफ फरास, युवराज गवळी, प्रभारी मुख्य कार्यकारी अधिकारी श्री. जी. एम. शिंदे उपस्थित होते.

केडीसीसी बँकेकडून शेतकऱ्यांना दोन लाखांचा अपघाती विमा लवकरच निविदा मागवून पगारदार खातेदारांसाठीही आणणार सामूहिक विमासुरक्षा योजना अध्यक्ष व मंत्री हसन मुश्रीफ यांची माहिती.

पावणे तीन लाख शेतकऱ्यांची संपूर्ण विमा हप्ता रक्कम भरली बँकेने. कोल्हापूर, दि. २१: कोल्हापूर जिल्हा मध्यवर्ती सहकारी बँकेने जिल्ह्यातील सर्वच विकास सेवा संस्थांच्या १८ ते ८५ वर्षांपर्यंतच्या किसान क्रेडिट कार्डधारक कर्जदार सभासद शेतकऱ्यांना अपघाती मृत्युपोटी दोन लाख रुपये भरपाई करणारा व्यक्तिगत अपघाती विमा उतरला आहे. विमा हप्त्याची एक कोटी, १९ लाखाची सर्वच रक्कम जिल्हा बँकेने भरली आहे, अशी माहिती बँकेचे अध्यक्ष, वैद्यकीय शिक्षण व विशेष सहाय्य मंत्री हसन मुश्रीफ यांनी दिली. यामुळे जिल्ह्यातील शेतकरी बंधूंना कोणतीही तोशीस लागणार नाही. लवकरच निविदा मागवून जिल्हा बँकेकडे पगाराची खाती असलेल्या नोकरदारांसाठी ३० लाख रुपयांच्या सामूहिक अपघाती विमा सुरक्षेची योजना आणण्याचा निर्णयही बँकेच्या कार्यकारी समितीच्या बैठकीत झाला. शेतकऱ्यांसाठीच्या या योजनेत समाविष्ट अपघातांच्या प्रकारांमध्ये रस्ते अपघातसह, सर्पदंश, पाण्यात बुडून मृत्यू, विजेच्या धक्क्याने मृत्यू, वीज पडून झालेला मृत्यू, जंगली प्राण्यांच्या हल्ल्यात झालेला मृत्यू, शेतीकामे करताना झालेले अपघात आदी बाबींचा समावेश आहे. याबाबत अधिक माहिती अशी, या योजनेअंतर्गत अपघाती मृत सभासदाच्या वारसाला दोन लाख रुपये भरपाई मिळणार आहे. कोल्हापूर जिल्ह्यातील दोन लाख, ८५ हजार, ८८० कर्जदार सभासद शेतकऱ्यांना या विमा सुरक्षेचे कवच लाभले आहे. कायमचे आणि अंशतः अपंगत्व आल्यासही शेतकऱ्याला या योजनेमधून भरपाई मिळणार आहे. कर्त्या कुटुंब प्रमुखाचा अपघाती मृत्यू झाल्यानंतर शेतकरी कुटुंब उघड्यावर पडू नये, या उद्देशाने संचालक मंडळाने हा महत्त्वपूर्ण निर्णय घेतला आहे. आज झालेल्या कार्यकारिणी समितीच्या बैठकीत ईफको टोकियो जनरल इन्शुरन्स या विमा कंपनीला धनादेश दिला. मुदत एक वर्षापर्यंत आहे. यावेळी बँकेचे संचालक आमदार सतेज उर्फ बंटी पाटील, माजी खासदार डाॅ. श्रीमती निवेदिता माने, प्रताप उर्फ भैय्या माने, रणवीरसिंह गायकवाड, विजयसिंह माने, सुधीर देसाई, रणजीतसिंह पाटील, सौ. श्रुतिका काटकर, सौ. स्मिता गवळी, प्रभारी मुख्य कार्यकारी अधिकारी श्री. जी. एम. शिंदे आदी उपस्थित होते. अशी आहे शेतकरी अपघात विमासुरक्षा योजना……. ● इफको-टोकीयो जनरल इन्शुरन्सच्या सहयोगातून अपघाती विमा योजना….. ● सेवा संस्थाकडील किसान क्रेडिट कार्डधारक कर्जदार असलेल्या एकूण दोन लाख, ८५ हजार, ८८० शेतकऱ्यांना विमा सुरक्षाकवच…… ● अपघाती मृत्यू झालेल्या शेतकऱ्यांच्या कुटुंबीयांना दोन लाखांची भरपाई……. ● कायम व अंशतः अपंगत्व आलेल्या शेतकऱ्यांना त्या- त्या प्रमाणात भरपाई……. ● शेतकऱ्यांना तोशीस लागू न देता बँकेनेच उचलला आहे विमा हप्त्याचा भार….. कोल्हापूर -केडीसीसी बँकेच्या शेतकरी अपघात विमा योजनेच्या हप्त्याचा धनादेश शाखाधिकारी आशिष साळी व ऑफीसर अमोल सूर्यवंशी यांच्याकडे देताना बँकेचे अध्यक्ष, वैद्यकीय शिक्षण व विशेष सहाय्यक मंत्री हसन मुश्रीफ. यावेळी संचालक मंडळातील आमदार सतेज उर्फ बंटी पाटील, माजी खासदार डाॅ. श्रीमती निवेदिता माने , प्रताप उर्फ भैय्या माने, रणवीरसिंह गायकवाड, विजयसिंह माने, सुधीर देसाई, रणजीतसिंह पाटील, सौ. श्रुतिका काटकर, सौ. स्मिता गवळी, प्रभारी मुख्य कार्यकारी अधिकारी श्री. जी. एम. शिंदे आदी उपस्थित होते.

आमदार राजूबाबा आवळे यांच्या हस्ते केडीसीसी बँकेच्या प्रांगणात ध्वजारोहण

कोल्हापूर, दि.१५: कोल्हापूर जिल्हा मध्यवर्ती सहकारी बँकेच्या प्रांगणात ७६ व्या स्वातंत्र्य दिनानिमित्त बँकेचे उपाध्यक्ष व आमदार राजूबाबा आवळे यानी ध्वजारोहण केले. यावेळी बँकेचे संचालक प्रताप उर्फ भैया माने, कर्मचारी प्रतिनिधी दिलीप लोखंडे व आय. बी. मुनशी, प्रभारी मुख्य कार्यकारी अधिकारी जी. एम. शिंदे, केंद्र कार्यालयासह कोल्हापूर शहरातील सर्व शाखांचे अधिकारी व कर्मचारी उपस्थित होते. …………. कोल्हापूर: केडीसीसी बँकेच्या प्रांगणात बँकेचे उपाध्यक्ष व आमदार राजूबाबा आवळे यांच्या हस्ते ७६ व्या स्वातंत्र्य दिनानिमित्त ध्वजारोहण झाले. यावेळी संचालक प्रताप उर्फ भैय्या माने, प्रभारी मुख्य कार्यकारी अधिकारी श्री. जी. एम. शिंदे व इतर प्रमुख.

इतर बातम्या आणि ठळक घडामोडी